بسم الله الرحمن الرحيم
في البداية أحب إني أذكر إن العبدلله حاصل على ماجستير في الرياضة التطبيقية من جامعة كاليفوريا سنة 2009 يعني المناقشة اللي هعرضها هنا مبنية على دراسة مش بفتى و خلاص
اتصل بي أحد الاصدقاء اليوم ليخبرني عن تلك الطريقة المبتكرة لعمل مبالغ خرافية من الاموال عن طريق شراء منتج معين و محاولة إقناع شخصين على الاقل بفعل الشيء نفسه من خلال شركة تدعى كيو-نت و من أجل إقناعي بالفكرة أرسل لي ملفات تشرح الطريقة "المبتكرة" لإنقاذ العالم من الفقر و جعل الجميع أغنياء
بمجرد الاطلاع على التفاصيل اكتشفت إن هذه الطريقة ما هي إلا نوع جديد من طريقة النصب المستهلكة و المعروفة باسم "بونزي" و التي تعتمد بالاساس على البناء الهرمي للارباح .. بدون إطالة تخيل إنك على قمة هرم وتقف على كتف شخصين و كل منهم يفعل الشيء نفسه ... العلاقات بين الاشخاص المكونين لهذا الهرم تكون أسية
exponential
و لهذا السبب تضاعف الارقام سريعا فمثلا قمة الهرم (اللي فيها سيادتك) فيها شخص واحد بينما طبقة واحدة للأسفل يوجد بها 2 ثم 4 ثم 8 ثم 16 و هكذا حتى نجد إنه بعد 27 طبقة فقط يوجد 134,217,728 شخص أي ما يعادل أكثر من سكان مصر كلها
تستغل هذه الانظمة الاحتيالية تلك الخاصية في تقدير خيالي و غير حقيقي لارباح بعض العمليات المالية اللتي تتم داخل هذا الهرم - مثلا لو اشتريت منتج ب 600 دولار و بعدين الاتنين تحت منك عملوا نفس الشيء الشركة تديلك 50 دولار يبقى انت دخلك في السنة الرابعة هيوصل لمليون دولار أو أي هجص مماثل ... الكلام ده بمنتهى البساطة مش هيحصل للأسباب الاتية
أولا: الفكرة قديمة قوي و تم استخدامها مليون مرة قبل كده في الاحتيال على الناس و اللي عايز يقرا أكتر عن التفاصيل ممكن يلاقيها هنا
http://en.wikipedia.org/wiki/Pyramid_scheme
http://en.wikipedia.org/wiki/Ponzi_scheme
ثانيا: لتوفير الوقت على الناس اللي مبتحبش تقرا كتير - العملية كلها هتقف بسرعة جدا ففكرة حنفية الاموال المفتوحة دي مش مكتوبلها النجاح و عمرها قصير جدا لسبب بسيط و هو إن عدد الناس المنضمين للهرم بيكبر بمعدل هائل يعني لو سيادتك اللي بدأت اللعبة دي في مصر و كنت على قمة الهرم و بفرض إن كل المصريين هينضموا للعبةدي - الهرم بتاع مصر كلها هيكون مكون من أقل من 27 دور (23 دور تحتوي على أكتر من 8 مليون شخص) و الناس اللي في الدور اللي تحت (حوالي نص المصريين) مش هيلاقوا أي مصري جديد يضيفوه للهرم لان كل المصريين موجودين في الهرم بالفعل .. فالاربعين مليون شخص دول يستعوضوا ربنا في فلوسهم
ثالثا: بفرض إن سيادتك من المحظوظين اللي في الادوار اللي فوق و ده إحتمال صغير قوي لأن الادوار اللي فوق بتتشغل بسرعة جدا (1024 شخص فقط في العشر أدوار الاولى بنسبة 1:10,000 ) ممكن تعمل شوية فلوس في الاول لغاية الهرم ما يتملي ... بس خللي بالك الفلوس دي من دم الغلابة اللي تحت منك يعني في شبهة جامدة قوي إنها حرام بس دي تسئلوا فيها شيخ و يا ريت يكون دارس رياضة عشان هو كمان ما يفتيش و خلاص
رابعا: التأثير بالغ الضرر على إقتصاد الدول .. تعالوا نصدق إن العملية تسويقية بحتة (رغم إنها مش كده) العالم دي بتقنعك تشتري منتج (في الغالب أجنبي) من أجل الانضمام للهرم و سيادتك بتشتري مش عشان انت محتاج المنتج فعلا - سيادتك بتشتري المنتج عشان بتحلم بأرباح هائلة مش هتيجي أصلا .. طيب تعالوا نفرض إن ربع المصريين بس عملوا الحكاية دي لو متوسط سعر المنتج 300 دولار يبقى إحنا في فترة قصيرة جدا سحبنا 6 مليار دولار (أكتر من المعونة الأمريكية) من الاقتصاد المصري و بعتناهم للخارج بدون ما تعود علينا أو على إقتصادنا أي فايدة حقيقية ... الفلوس دي إحنا أولى بيها ... الكلام ده الدول المتقدمة حاربته من زمان بسن قوانين تجرم مثل هذه المعاملات .. بس للأسف بلادنا لسه مفتوحة على البحري لمثل هذه الانشطة المدمرة للإقتصاد
خامسا: بمنطق مين بس إن يكون دخل كل واحد فينا مليون دولار في السنة من غير ما يقابل ده زيادة في الانتاج العالمي .. لو ده حصل ساندوتش الفول هيكون بمائة الف دولار و الفلوس مش هيكون ليها أي قيمة
أخيرا .. كل واحد يتقي ربنا و يشوف شغله و ينتج على قد ما يقدر لو عايز يعيش كويس و الرزق ده بتاع ربنا
اللهم بلغت اللهم فاشهد - لو عايز تاخد أجر انشر النوت دي (وعلى فكرة هو ده الربح الأسي الوحيد اللي مفهوش نصب - بنفس الطريقة لو كل واحد نشر النوت دي لاتنين من صحابة مصر كلها هتتعرف على عملية النصب دي و تتجنب أخطارها في وقت قليل فحاول تكون من الادوار اللي فوق في الهرم عشان حساناتك تكتر:) - والله يضاعف لمن يشاء
ملحوطة أخيرة: تلقيت العديد من الرسائل في الفترة الاخيرة بخصوص الموضوع ده و فيها تعليقات جيدة للغاية .. بس صعب أرد عليهم لكثرة العدد ... برجاء أي حد عنده تعليق يا ريت يضيفه أسفل النوت عشان الناس كلها تستفيد
وجزاكم الله كل خير
محمد صلاح عبيدة
ليست هناك تعليقات:
إرسال تعليق